Будапешт хот бол барилга архитектурын өв ихтэй Европын хуучин хотуудын нэг. Ийм ч учраас энэ хотын гудамжаар алхах үед таныг готикийн үеэс эхлээд неоклассик, цаашлаад модерн архитектурын цаг хугацаагаар аялуулах болно. Барилга болгон нь түүх өгүүлэх ч эдгээр 5 барилгыг архитектурын төлөөлөл болгон танилцуулж байна.
Баруун бүсийн төмөр замын буудал (Nyugati Palyaudvar)

1877 оны 10 дугаар сарын 28-ны өдөр нээлтээ хийж байсан тус төмөр замын буудал нь Нюгати хэмээх нэрээр нэрлэгддэг. Хотын төвийн тээврийн төвүүдийн нэг ба үндэсний болон олон улсын хэд хэдэн чиглэлд үйлчилдэг юм байна. Архитектур сонирхогчид энэ барилгыг хэд, хэдэн шалтгаанаас болон зорин ирж үздэг. Эйфелийн цамхагийн архитектор, инженер Густав Эйфел энэхүү барилгын архитектор. Алдарт цамхаг баригдахаас 10 жилийн өмнө баригдсан төмөр зам юм. Энэхүү төмөр замын буудлын барилга том шилэн фасадтай, 2 жижиг дом оройнуудтай бөгөөд гол том дом оройтой  холбогддог юм байна.
Парламентын ордон

Парламентын ордон нь Будапешт хотын дундуур урсах Дунай мөрний эрэг дээр оршдог бөгөөд тэгш хэмт фасад, готик стилийн архитектурын төлөөлөл юм. Эртний Ренессансын сэргэн мандалтын үеийн стилийн бөмбөгөр орой нь барилгын төв хэсэгт байх ба барилгын материалд тоосго, үнэт чулуу, алт зэргийг ашиглажээ. Унгарын Засгийн газар тухайн үед шинэ Парламентын ордон барихын тулд гадаадын архитекторуудын дунд тэмцээн зарласан ба уг тэмцээнд архитектор Imre Steindl-ын барилгын зураг шалгарч, ийнхүү баригдаж байжээ.

Дуурийн театр

Архитектор Miklos Ybl-н алдартай барилгуудын нэг бөгөөд Нео-Ренессанс стилээр 1875-1884 оны хооронд баригдсан ба ЮНЕСКО-н үнэт өвд бүртгэгдсэн барилга юм. Тэгш хэмт шохойн чулуун фасадтай ба дээд талын террас хэсэгт Унгарын алдартай хөгжмийн зохиолчдын 16-н хөшөөг байрлуулсан байдаг. Нийт 1260 хүний суудалтай бөгөөд дотор талын интерьерийг гантиг чулуу болон алтаар чимэглэжээ. Дашрамд сонирхуулахад, театрт зөвхөн жүжиг үзэхээр зорих биш аялагчдад театртай танилцах боломжийг давхар олгодог ажээ.
 

St. Stephen’s Basilica

Энэхүү Роман Католик Басилика нь 1905 онд бүрэн баригдаж дууссан ба Будапешт хотын хамгийн өндөр барилгуудын нэг юм. Өндрөөрөө Парламентын ордонтой адил. Нео Классик стилээр баригдсан бөгөөд интерьер нь үнэхээр гайхалтай, гантиг чулуу, алтаар чимэглэж, нүүрэн талыг чулуугаар өнгөлжээ. Алдарт архитектор Miklos  Ybl, Jуzsef Hild, Jуzsef Kauser  нар хамтран ажиллажээ. Нийт 2 хонхтой цамхаг болон гол бөмбөгөр орой байдаг ба барилгыг барихад 54 жилийг зарцуулжээ. Өнөөдрийн байдлаар энэхүү барилгад жуулчид зочлохын зэрэгцээ 2 цамхаг дээрээс хотын фонарамыг бүрэн дүүрэн хардаг байна.

Fisherman’s Bastion

Унгар улс  байгуулагдсаны түүхэн ойд зориулж 1895-1902 оны хооронд энэхүү байгууламжийг барьжээ. Маттиас сүмийн чанх  хажууд байрлах  энэхүү байгууламжийг архитектор Frigyes Schulek бүтээсэн ба эртний Унгарын Нео-Романиск стилээр төлөвлөсөн. Энэхүү байгууламж нь долоон цамхагаас бүрдэх ба 895-1895 оны хугацаанд Унгар Улсыг удирдаж байсан долоон удирдагчаар төлөөлүүлэн бүтээжээ. Сонирхуулахад, XX зууны сүүлийн үеийн хотын агаарын бохирдлоос болж байгууламжийн өнгө саарал болон хувирсан тул уг барилга болон цамхагуудыг  дахин сэргээснээр хотын хамгийн үзэсгэлэнтэй газруудын нэг болж чаджээ.